عْلاَشْ بْكَى الليل ؟؟؟

****1****

زجل بقلم: ذ. حمادي الموقت

دار ولد زيدوح / أبريل 2008

مَلّي بْغِيت نَشْرَب الليل فْ كاس الهَمْ

ونصوّر الحرف ف درب حياتي

جِيت وَاكَل الكلام ف طبسيل النهارْ

والنهار ف ليلو يْهَزْ كتافو

علاش مايْبْقى ف النهار ولد احْزَانو

والليل يَرجع شمس  ف حُومة نهارو

****2****

خْبَارك يا الدّرّي ....

جْرَاتْ فعَرْق اللبنْ

وانتَ ما انتَ

كْبَرتي ودَرْتي المرا وهربتي

وخليتي ولادك شي مجروح، شي ملايح لهيه ف درابل نعاسكْ

****3****

ملّي حَسّنتي الرّاس ونبّتي السبولة

بانت المرا العاكرة بْوَلْدها كاتجري ف حصايد الدنيا

وخُوتي وقتها ما قراو حروف الترابْ

ف وْرَاقْ الدفلة

ولكن قراو الحجرة ف لوح الثمرة والورقة

****4****

قولو لي علاش بكى الليل

وعلاش رقص زماني

أنا فين تالف – عليك- وهايفْ

وحبك مطروز ف قلبي وف دمي

علاش نْكَلّم الناس عليك

وانتَ عارف كيفاش لِيلِي

وكيفاش شطح ف خصامي

***5****

آه. يا النايم فِيقْ والْبس عْراك

وتْسَنّى نهارك

اللي يطل فيه عليك بكلمة من حصادو

يا العربي، يالسّاكتْ

فين خبزي وفين أرضي

فين دمي وفين قلبي

علاش يبكي الليل علاش

وانتَ عارف لِيلِي وْلِيلَك

ليل واحد للواحد

ف كُونْ ما ليَّ ولاَ لِيكْ .